حياتي من غيابك جرح ب قلبي عجزت اخفيه / ممدوح العضيباوي

حياتي من غيابك جرحن بقلبي عجزت اخفيه
وتفضحني عيوني كل ما حاولت كتمانه
انا بعدك وصلت الدار لكن مالقيتك فيه
سألت الدار واهل الدار سكانه وجيرانه
وقالولي رحلتي بس مايدرون وين وليه
وخليتي حبيبك يشتكي بعدك وحرمانه
عسى دار ٍ يضمك كل ما مر الحيا يسقيه
وينبت به زهور و ورد وينهض حظ سكانه
انا بعدك ليا مني كتبت البيت رحت امحيه
عجز شعري يوصف روعتك وانكسرت اوزانه
الا ليت الزمن يرجع ورا ويعوّد لماضيه
ويرجع للفرح قلبي وينسى باقي احزانه
حياتي ما يموت الحب والذكرى معك تحييه
وعمرن معك قضيته عليه صعب نسيانه
حياتي طول غيابك واخاف ان الجفا تاليه
وانا من دونك الايام عندي مالها خانه
حفظت وجيه مرتني بدنياي ونسيت وجيه
ولكني عجزت انساك يا احلى واجمل انسانه
انا ذكراك شالتني وودتني حدود التيه
وخلتني كتابن قصة الحرمان عنوانه
انا اللي ما بقاله في زمانه واحد ٍ يبكيه
خذاه الطيش وابعدبه وفرق عنه خلانه