ارحل توارى ضيع روح ابتعد غيب

غافلتني وارهيت حمر  المشاهيب=واركيتهن فوق الضلوع  النحيفه
جرح من اهل صدري وغيرة اجانيب=لاغاب واحد جاك الاخر  حليفه
كان التصدد عيب لابسني  العيب=تكفى تجنبني الوداع ورصيفه
الهم جردني واجاد المقاضيب=ماكنت سيفة لكن ا ليوم  سيفه
عودتني ارقى بحزني مراقيب=واجيك وتشيل الحزن  بالنصيفه
ماكان عند الليل غير التراحيب=وبعدك لقيت اطراف لونه  مخيفه
على مكانك طاح دمع المكاتيب=تجهم اكثر ماحسبني وليفه
يمكن اطيب ويمكن ارحل ولااطيب=ماعاد يغرينا مقيل  وسقيفه
لقيت في كف المفارق  مخاليب=مات الربيع ومات عقبه  خريفه
احلام والاحلام صارت عشا ذيب=وبعض المبادي في غيابك سخيفه
صارت ذعاذيع النسايم لواهيب=ومتساويات المبصرة والكفيفه
ارحل توارى ضيع روح ابتعد  غيب=لكن زهابك من قصيدي  وطيفه
وان جيت لك بين الحنايا معازيب=ابخلهم اللي سال دمه لظيفه
ياسيد تلع المترفات الرعابيب=يشبه جفولك للمهار العسيفه
ارخيت رمشك وانت ماودك تصيب=وطاح الجوادبفارسه  وبرديفه
لاجا من العشر التوالي مطاليب=عرض قناديلك ظلام  الحتيفه
اقول في شقر الجدايل  عذاريب=حفلة ذهب يالشامخات المنيفه
اما النحل يغريه حلو المشاريب=وشمس الغروب لجمرتينك  وصيفه
في ضحكة اللولو نشوف الاعاجيب=في ساحل عيونك سيوف رهيفه
اشتاق لك وتضيق عوج  المحاديب=ويرف لك قلب ينام  برفيفه
عود علي قبل المعارك مع الشيب=ماقصدي اثقال الحمول الكليفه
نوخت حالي حال حرش  العراقيب=وتتعب وراي ملاعبات  السفيفه
لكن لك بوجهي ديون ومواجيب=بلبسك تاج السنين العفيفه
خذني شريكك بالجروح  المعاطيب=مثل الكريم تشاركة في رغيفه
ولادمي لو كان يعلم عن الغيب=يمديه يختار النهايه  بكيفه