غافلتني وارهيت حمر المشاهيب
واركيتهن فوق الضلوع النحيفة
جرح من اهل صدري وغيرة اجانيب
لاغاب واحد جاك الاخر حليفة
كان التصدد عيب لابسني العيب
تكفى تجنبني الوداع ورصيفة
الهم جردني واجاد المقاضيب
ماكنت سيفة لكن ا ليوم سيفة
عودتني ارقى بحزني مراقيب
واجيك وتشيل الحزن بالنصيفة
ماكان عند الليل غير التراحيب
وبعدك لقيت اطراف لونه مخيفة
على مكانك طاح دمع المكاتيب
تجهم اكثر ماحسبني وليفة
يمكن اطيب ويمكن ارحل ولا اطيب
ماعاد يغرينا مقيل وسقيفة
لقيت في كف المفارق مخاليب
مات الربيع ومات عقبه خريفة
احلام والاحلام صارت عشا ذيب
وبعض المبادي في غيابك سخيفة
صارت ذعاذيع النسايم لواهيب
ومتساويات المبصرة والكفيفة
ارحل توارى ضيع روح ابتعد غيب
لكن زهابك من قصيدي وطيفة
وان جيت لك بين الحنايا معازيب
ابخلهم اللي سال دمه لظيفة
ياسيد تلع المترفات الرعابيب
يشبه جفولك للمهار العسيفة
ارخيت رمشك وانت ماودك تصيب
وطاح الجواد بفارسه وبرديفة
لاجا من العشر التوالي مطاليب
عرض قناديلك ظلام الحتيفة
اقول في شقر الجدايل عذاريب
حفلة ذهب يالشامخات المنيفة
اما النحل يغريه حلو المشاريب
وشمس الغروب لجمرتينك وصيفة
في ضحكة اللولو نشوف الاعاجيب
في ساحل عيونك سيوف رهيفة
اشتاق لك وتضيق عوج المحاديب
ويرف لك قلب ينام برفيفة
عود علي قبل المعارك مع الشيب
ماقصدي اثقال الحمول الكليفة
نوخت حالي حال حرش العراقيب
وتتعب وراي ملاعبات السفيفة
لكن لك بوجهي ديون ومواجيب
بلبسك تاج السنين العفيفة
خذني شريكك بالجروح المعاطيب
مثل الكريم تشاركة في رغيفة
ولادمي لو كان يعلم عن الغيب
يمديه يختار النهايه بكيفة
0 comments:
إرسال تعليق