الا ياليت من له يا سعد جنحان وبها يطير
ليا ضاقت عليه الارض عنها مع سماها طار
كما حرٍ لياعاف الوكر عزم على المطير
كفخ باطراف جنحانه سما وابعد عن الصقار
الا ياليتني مثله معي جنحان يا ابن مطير
لياعفت البلد بدلتها دارٍ بدلها دار
ابدلها بدار اهل الكرم والجود واهل الخير
عزيزين الجناب الله يكافيهم لهيب النار
اخير من الذي قربه خسيس اخس من الخنزير
خبيث اطباع مايشبه لطبعه غير طبع الفار
ليامنك بغيته في لزومٍ حلها عسير
يقول اظروفنا ماتسمح ويبدي لك الاعذار
والى منه بداله حاجةٍ عندك يجيك مغير
يجيك يسابق الخطوه وينسى كل شيٍ صار
عسى عمره بدنياه الطويله يافهد قصير
ولايلحق بها مايمتنيه الخاين الغدار
انا لي عادةٍ عاشت معي من يوم كنت صغير
احب الطيب واهل الطيب والطيب عليه اغار
ولا داني هل النمات واهل القيل والتزوير
صداقتهم تراها ياوسيع العرف خزي وعار
