انا مثل البحر يغري هدوه
هدوي كالبحر لاصار هادي
ولا من هاج موجه فيه قوه
عناده يشبه لقوة عنادي
لكن البحر ماعنده مروه
لو انه مد لك بيض الايادي
ولا يعرف صديقه من عدوه
طبيعي لو غدربك شي عادي
وانا تلزمني احكام الاخوه
واعرف اللون الابيض والرمادي
حفظت دروس جامعة الابوه
دروسه للعقل شربٍ وزادي
سموي مستمده من سموه
وناري تقدح براس الزنادي
اغار وعندي بربعي حموه
ماخلي ماقفي يوم التنادي
طويق المجد عديت بعلوه
ورزيت العلم فوقه ينادي
وراسي ماحنيته في حنوه
يكود لخالقي رب العبادي
