عجزت أداري أيام الشقا يا قلبي الملهوف
عجزت وبيدي أزمام الرضى لو ضاقت أيامي
عرفت ولا عرفت بدنيتي كون الأمل والخوف
اخاف الليل ياتي دمع عين بلل أكمامي
أخاف الشمس تشرف عالعيون و دمعها مذروف
و أخاف يموت صبري وأستصيب بجرحي الدامي
أخاف يصير دمعي فوق خدي منظر مئلوف
أخاف يطيح بي عزمي وأنا اللي مقصدي سامي
أخاف و داخلي صبر تشوفه مقلة المكفوف
كما قال المثل من خاف يسلم رميت الرامي
و أنا صبري على ساس متين والهدف معروف
بعون الله ثابت لو يجي طوفانهم طامي
بنيت الصبر بيت في خفوقي بالأمل مرقوف
بنيته يحتضن حلم بقي من تالي أحلامي
أبصبر و آرد الصافي و أدور ما يداوي الجوف
وأبعثر من حروف الشعر ما سالت به أقلامي
نقشت الجزل من صبري على بيض الكفوف حروف
و أجر الصوت مبحوح عسى يمحي صدى ألآمي
رفعت الصوت ما أدري رغم ماني و الله بملقوف
ولكنه شعور الشاعر اللي بات إلزامي
خذتني لمعت بروق القصيد اللي تقود قنوف
خذتني وأستهلت وبل مزن يروي الضامي
مع صوت الرعد .. نغم الحروف ولحنه المعزوف
بأسامر ليلته دامه هواي ومصدر إلهامي
هويت الشعر و أحبه ولو راعي الهوى مكشوف
أحبه والمحبه شي ما يخضع لأحكامي
كتبته قدوتي حسان شعر و منهج (ن) و سيوف
كتبته و أطلب الله .. يالله أنك تدمح أثامي
أظنه واضح سر الرضى يا قلبي الملهوف
عرفت وبيدي أزمام الرضى لو ضحكت أيامي
