صوتك يغنيني عن الشوف ^_^

تجارة العدسات من اربح المشاريع مادياً الدقيقة فيلا أحد يستغني عنها في هذا العالم وهي تعتبر اعظم اختراعات البشر وتحسب (بعد فضل الله ) للشيخ ادولف فيك صاحب النظريات في علم الانتشار طبعاً ادولف ينتسب لاشهر قبائل ألمانيا عيال حارتهم كانو يسمونه أبو شهاب لأن شنباته مهي بعيده عنه لكن فرق بينهم ان أدولف بالعلم له صولات وجولات وابو شهاب طلع خيطي بيطي ومثل حريمااااته ( على قولهم  ) ادولف فيك هو الي كان سبب في شوفي للعالم الخارجي خلال الشهر الماضي وتغيير نظرياتي في الشارع السعودي ( نظريات مهو نظارات )

البداية
كانت البداية في فندق الفورسيزن بعد ما لقيت بالصدفة البقره الي كانت تقولي بمعرض الكتاب ( لك يومين تكبس بعيونك ) انا شفتها و كنت طالع لإجتماع و حسيت اني ضايع و قلت واحد من أثنين , يا اسوي ليزك او أعتزل هالاماكن لان الوضع صار خيطي بيطي , اعمى و أسمي اشوف ^_^
ثاني يوووم
كنت في الملتقى السعودي الدولي للمنشآت الصغيرة والمتوسطة ( الي يسونه بعض الجهات الحكومية و الخاصة عشان يسوون نفسهم يدعمون مشاريع الشباب وهي سوالف بس و فلوس تكاليف هالملتقى ضمن مصروفات هالوزارات ) نرجع لسالفتنا كنت اذا بتكلم مع احد لازم أكبس بعيوني عشان اشوف وجه الي قدامي ( التكبيس هو رفع الخشم للاعلى و أنزال الجبهه للاسفل ) وكانت حالتي كذا طول وقتي ( لا تجرب تكبس ) , و في نهاية الملتقى أخذني واحد من اصدقاي و أجبرني ألبس نظارات و تم هالشي بمساعدة الدكتور و انا و العدسات مطارح عشان البسها ولا هي راضية من كبر عيوني ^_^ و بعد لبسها كانت المفاجئة ……….
وش هي المفاجئة ؟
كانت الي عرفته أني بعالم ثاني , شي جديد , ابداع في كل شي بالرياض , لوحة سنتربويت من اكثر الاشياء الي شدني فكرتها , و لوحات في طريق العليا العام أول مره اشوفها , و ذاك اليوم نايم الفجر بسبب الهوايل الي شفتها ,
وش اللي شفته ؟
كان اول اشياء اشوفها بالتحلية السيارات ومناظر البشر اللي مدري شلون جايه اشكالهم وخاصة فئة الكدش ( البنات المتوحشات ) وكانت أهم جولة لي في ممشى الروضه وكانت من اكثر الاشياء اللي تشدني فيه مجموعات شباب كانهم طالعين من عرس وبنات أردى منهم بكثير واكثر شي صدمني النقاب ^_^ لاني اعرفه ستر قبل العدسات
والنقاب ( هو الغطاء لوجه البنت اللي يطلع عيونها ) ما كنت اتوقعه فتنه هالشي , ولا توقعته بهالطريقة , كنت اشوفه ستر و طلع فتنه وخاصة انه يطلع احلى شي بالبنت عيونها لاني اشوف الرموش وكنت ادلخ بشكل كبير وانا بالممشى وبسبب تغيير نظرياتي وتوجهاتي الحنتوشية والليبرالية ( الليبرالية عشان اللي يتهمني يصدق نفسه ^_^ )

زبدة الكلام :: أنصحكم بالعدسات تراها زينه ^_^ و أشكر أدولف فيك  و اهديه كلمات صوتك يغنيني عن الشوف

بصوت الفنانه أريام اللي كنت منزلق معه بيوم من الايام العاشق الولهان الله ياذيك الايام والحمدلله اللي عدت على خير هههههه